A Consellería de Sanidade, a través do xerente de atención primaria, acaba de facer pública a marcha atrás no proxecto de reforma da Casa do Mar para instalar alí os servizos de odontoloxía e de fisioterapia, proxecto condicionado ó acordo co ISM , Costas e Benestar para a reubicación das oficinas actuais e a supresión do salón de actos e sala de lectura.
Como administración responsable da Sanidade, supoñemos que a Consellería toma esta decisión no exercicio da súa exclusiva competencia e co mellor criterio de xestión e eficacia dun servizo básico e necesario como é a saúde.
A Federación e a Plataforma da Sanidade manifestaron as súas dúbidas, máis que razoables, sobre a oportunidade desta proposta cando xa se dispoñian duns locais provisionais, aceptados pola Consellería para esta finalidade, e a meses vista de dispoñer dos terreos para a construcción do, tantas veces prometido e tan necesario, novo centro de saúde.
A Federación se felicita de que, por unha vez, a administración tivese en conta o punto de vista veciñal cando xustifica este repentino cambio de postura no “rexeitamento dalgúns colectivos veciñais”. Realmente o que queren dicir é que as dúbidas do movemento veciñal tiñan fundamento e foron tidas en conta:
1. A estructura e condicións constructivas da Casa do Mar non están pensadas para unha nova carga de servizos e non se resolve cun simple cambio de tabiques. A titularidade é de Costas baixo unha concesión ata o ano 2018 que non permite obras.
2. No suposto de afrontar a obra, suporía condicionar a capacidade de inversión do Sergas na comarca a corto prazo sen resolver, por evidente falta de espacio, as necesidades reais dunha localidade de 20.000 habitantes: non só a fisioterapia ou odontoloxía senón o resto de servizos que se ofrecen, por exemplo, en Cangas, saúde mental, etc…
3. E tamén, a Consellería valorou a rendibilidade política desta medida: o atraso na posta en marcha destes servizos ata as eleccións municipais, e o problema social da supresión dun salón de actos que acolleu no ano 2009 máis de sesenta actos cívicos e culturais.
4. Non sería de loxico que Moaña para ter novos servicios teña que renunciar a outros como un salón de actos
Parécenos unha decisión moi sensata e o único que temos que lamentar e a falla de capacidade da Consellería de asumir a súa rectificación con naturalidade sen ter que “criminalizar” os colectivos veciñais para poñer unha cortina de fume que disimule a precipitación e irresponsabilidade dalgún líder político local. “A vella táctica de matar o mensaxeiro xa non é de recibo”.
Federación de Asociacións de veciños de Moaña A Chamusca
Moaña, 14 abril 2010.
